ഷട്ടര്‍

ജോണ്‍ ആബ്രഹാമിന്റെ സിനിമയിലെ നായകന്‍ സംവിധാനം ചെയ്ത സിനിമ ജോണിന്റെ സ്മരണയുണയോടെ പ്രതീക്ഷയുടെ കൊടിപ്പടമുയര്‍ത്തിയാണാരംഭിക്കുന്നത്.പക്ഷേ...

കോഴിക്കോട് നഗരത്തിലേക്കു ക്യാമറ ഉണരുകയാണ്.പരസ്പരബന്ധമില്ലാത്ത ചില ദൃശ്യങ്ങള്‍, വ്യക്തികള്‍ . ഒരു ഓട്ടോ ഫോക്കസ് ചെയ്യപ്പെടുന്നു. പിന്നീട് റഷീദിന്റെ വീട്. ഓട്ടോ യാത്ര.സിനിമ ലൊക്കേഷന്‍.. സിനിമാസംവിധായകന്‍. ഓട്ടോയില്‍ റിട്ടേണ്‍ ട്രിപ്പ്. ഇത്തരം സംഭവങ്ങളെ കോര്‍ത്തിണക്കുകയാണ് ഷട്ടര്‍.

മറ്റുളളവര്‍ക്കായി ഷട്ടറു പോക്കാനും താഴ്ത്താനും ചില ജിവിതങ്ങള്‍

ആശ്രിതമായ ചില ചെറു ജീവിതങ്ങളുണ്ട്. അവരാര്‍ക്കു വേണ്ടി ജീവിക്കുന്നവെന്നു പോലും അന്വേഷിക്കാതെ ഓളത്തിലൂടെ ഒഴുകുകയാണ്. നിഷ്കളങ്കമായ മനസുളള ,പ്രതിഫലം ആഗ്രഹിക്കാത്ത ഉപകാരികള്‍. നഗരത്തിലെ ഓട്ടോ ഡ്രൈവറായ സുര (വിനയ് ഫോര്‍ട്ട്) അത്തരം ഒരാളാണ്. സത്യത്തില്‍ ഈ സിനിമയിലെ ഉജ്വലകഥാപാത്രമാണയാള്‍. ഇദ്ദേഹത്തെ നായകുപക്ഷത്തു നിറുത്തി ഈ ചിത്രം കാണാനാണ് ഞാന്‍ ആഗ്രഹിക്കുന്നത്. തുടക്കം മുതല്‍ ഒടുക്കം വരെ എല്ലാ ഗതിവിഗതികളെയും നിയന്ത്രിക്കുന്ന ഓട്ടോക്കാരനാണ് ഈ സുരന്‍. ജീവിതത്തിലാര്‍ക്കും അയാള്‍ അസുരനല്ലെന്നു സാരം.

ആരാണീ മനുഷ്യന്‍ ?പകല്‍മാന്യന്മാരുടെ അന്തിക്കൂട്ട വെളളമടിക്ക് വേണ്ടി ബിവറേജസില്‍ ക്യൂനില്‍ക്കുന്നവന്‍, മൊബൈലിലെ രതിക്കാഴ്ചകള്ക്കു കൂട്ടുകാഴ്ചക്കാരനാകുന്നവന്‍, കൂട്ടിക്കൊടുപ്പുകാരനോടും സാംസ്കാരിക പ്രവര്‍ത്തകരോടും ആരാധനകലര്‍ന്ന ചങ്ങാത്തം.നിറഞ്ഞ സത്യസന്ധത. ഫുഡ്ബോള്‍ കളിക്കാരോടും സാംസ്കാരിക പ്രവര്‍ത്തകരോടും ഓട്ടോക്കൂലി ചോദിക്കാതെ കൊടുക്കുന്നത് മാത്രം വാങ്ങുന്നവന്‍.. എല്ലാ കസ്റ്റമേഴ്സിനെയും തൃപ്തിപ്പെടുത്താന്‍ ആത്മാര്‍ഥമായി സന്നദ്ധനാകുന്നവന്‍, റഷീദിനു വേണ്ടി തെരുവില്‍ നിന്ന പെണ്ണിനെ ഒപ്പിച്ചെടുക്കാന്‍ ദുതുപോകുന്നവന്‍, റഷീദിനു വേശ്യാവേഴ്ചയ്ക് വളരെപ്പണിപ്പെട്ടു പറ്റിയ ഇടം ഒരുക്കാന്‍ ഉത്തരവാദിത്വമേറ്റെടുക്കുന്നവന്‍,വേശ്യയ്ക്കു വേണ്ടി ഭക്ഷണം വാങ്ങാന്‍ പോകുന്നവന്‍, അയാള് ഒരു സന്ദര്‍ഭത്തില്‍ പിമ്പില്‍ നിന്നും പെണ്ണിന്റെ റേറ്റ് ചോദിച്ചറിഞ്ഞു വെക്കുന്നെങ്കിലും തരപ്പെട്ടപ്പോള്‍ താല്പര്യം പ്രകടിപ്പിക്കാത്തവന്‍.... ആകെക്കൂടി തനിമായാര്‍ന്ന കഥാപാത്രം. ഓട്ടോയില്‍ ആളുകള്‍ കയറുന്നു ഇറങ്ങുന്നു. കൗതുകം. നൈമിഷിക സൗഹൃദം. കുശലം. പിന്‍സീറ്റിലെ പെണ്‍ചന്തത്തിലേക്കു റിയര്‍മിറര്‍ ഫോക്കസ് ചെയ്യലും ആസ്വദിക്കലും. ഓട്ടം ..വീണു കിട്ടുന്ന എല്ലാ സാധ്യതകളിലും സന്തേഷം കണ്ടെത്തുന്നവനാണ് സുര. തട്ടുകടയിലെ പാട്ടിനു താളം പിടിക്കുന്ന ആ രംഗവും പിന്നെ നിര്‍ബന്ധത്തിനു വഴങ്ങി ഹൃദയപൂര്‍വം അല്പം വീശുന്ന രംഗവും അയാളുടെ ആസ്വാദനനിഷ്കളങ്കത വ്യക്തമാക്കും.

മറ്റുളളവര്‍ക്കുവേണ്ടി ആത്മസംഘര്‍ഷത്തിന്റെ കനലുവാരിയുണ്ണുന്ന മനുഷ്യന്‍. കെണികളില്‍ നിന്നും കെണികളിലേക്കു വീഴുമ്പോഴും അതന്റെ പേരില്‍ വേദനിക്കുമ്പോഴും അതിനെ വേഗം മറന്ന് പഴയരീതിയിലേക്കു പോകുന്നു ഈ കഥാപാത്രം. അഭിനയത്തിന്റെ തികവ് കൊണ്ടാദരവു പിടിച്ചു പറ്റി എന്നു ഉറക്കപ്പറയാം. ഈ അഭിനയം കാണാന്‍ വേണ്ടി ഷട്ടര്‍ കാണാന്‍ പോകാം.

ഈ മനുഷ്യമനസ് വായിച്ചെടുക്കാന്‍ കാണികള്‍ പരാജയപ്പെട്ടാലോ എന്നു കരുതിയകണം ഒരിക്കല്‍ സുരയുടെ ഓട്ടോയുടെ പേര് ('നന്മയില്‍' ) വ്യക്തമാക്കുന്ന വിധം ക്യാമറ പിടിപ്പിച്ചത്. സംവിധായകന്റെ ഈ തോന്ന്യാസം വേണ്ടായിരുന്നു.

ഇനി ഈ സിനിമയുടെ പേരു് ഏത്രമാത്രം അനുയോജ്യമാണെന്നുളള പരിശോധനയാണ് നടത്തുന്നത്..അതു സിനിമയുടെ അവകാശവാദങ്ങളെ ഇഴകീറും. ഉളളടക്കപരമായ നോട്ടം ആദ്യം നടത്താം.

വിദ്യാര്‍ഥിനിയുംഷട്ടറും

കോഴിക്കോട്ടെ ലൈല കോളേജ് വിദ്യാര്‍ഥിനിയാണ്. അവള്‍ക്ക് ചങ്ങാതിമാരായി ആണ്‍കുട്ടികള്‍, മൊബൈലും മെസേജും ഫോണ്‍വിളിയും.. അവളുടെ പോക്ക് അതിരുവിടുന്നെന്നു അവളുടെ ഉമ്മ കരുതുന്നു, പിതാവ് റഷീദ് കരുതുന്നു. അതിരരാണ് നിശ്ചയിക്കുക? അമ്മയെ നിക്കാഹ് കഴിച്ചത് പതിനാലാം വയസില്‍. അപ്പോള്‍ മകളുടെ പ്രായം പരമ്പരാഗത ചിന്താഗതിപ്രകാരം അതിരു വിട്ടിരിക്കുന്നു. പിന്നെ തട്ടോം പര്‍ദ്ദേം ഒന്നുമില്ലാത്ത അവളുടെ രീതികളും ..വയസു തികഞ്ഞോ ഇല്ലയോ എന്നാരാ തീരുമാനിക്കേണ്ടത്. സര്‍ക്കാരോ? സമൂഹമോ? അതൊന്നും റഷീദിനു ബാധകമല്ല. അയാള്‍ അവളുടെ പഠനത്തിനും പുറത്തേക്കുളള സൗഹൃദത്തിനും ഷട്ടറിടുന്നു. യ്ഥാസ്ഥിതികതയുടെ ഈ ഷട്ടര്‍ തുറക്കുമോ? (സിനിമയുടെ അവസാനം ലൈലയെ കൊണ്ട് ഒരു പ്രസംഗം നടത്തിയതോടെ ജോയ് മാത്യു ദൃശ്യഭാഷയിലെ തന്റെ പരിമിതി വീണ്ടും വെളിവാക്കി.ഷട്ടര്‍ കുത്തിപ്പൊളിക്കാനുളള സിനിമയിലെ ശ്രമം പോലെ തന്നെ അതു തോന്നിച്ചു.) പെണ്‍കുട്ടികളുടെ പഠനജീവിതം മൂലം അനാവശ്യമായി അസ്വസ്ഥമാകുന്ന മുതിര്‍ന്ന തലമുറ. വ്യാഖ്യാനങ്ങളുടെയും മുന്‍വിധികളുടെയും തടവുകാരായ ഈ സമൂഹം ഷട്ടറുമായി നടക്കുകയാണ്.പെണ്ണിനെ ഭദ്രമാക്കാന്‍...

സദാചാരത്തിന്റെ ഷട്ടര്‍

സദാചാരപ്പോലീസിന്റെയും അവരുടെ മതബോധത്തിന്റെയും ഇര എപ്പോഴും ആദ്യം സ്ത്രീകളായിരിക്കും. അടച്ചിടുക. പൊതിഞ്ഞു മൂടുക, വായ് മൂടുക, സഞ്ചാരം മൂടുക ,സ്വപ്നങ്ങള്‍ മൂടുക, ചങ്ങാത്തങ്ങള്‍ മൂടുക. ചിന്തിക്കുന്ന പെണ്ണിനെ അവളുടെ ശരീരത്തില്‍ കുഴിച്ചുമൂടുന്ന അവസ്ഥയിലാണ് കേരളം. പരിഷ്കാരമണ്, അധുനികസാങ്കേതിക വിദ്യയുടെ അനുഗ്രഹമാണ് സദാചാരപ്രശ്നകാരണം എന്നു ലളിതവത്കരിക്കുന്ന കേരളം. ആധുനികതയും യുക്തിവാദവും വിപ്ലവോന്മുഖതയും വേരുപിടിപ്പിച്ച കാലത്തില്‍ വളര്‍ന്ന മധ്യവയസ്സിലെത്തിയവര്‍ എങ്ങനെ പിന്തിരിപ്പന്മാരായി മാറി എന്നു പരിശോധിക്കപ്പെടാന്‍ ഈ സിനിമ നിമിത്തമാകുന്നു. തങ്ങളുടെ പൂപ്പല്‍ പിടിച്ച ,വെളിച്ചവും ശുദ്ധവായുവും കടക്കാത്ത വീക്ഷണമാണ് യഥാര്‍ഥ പ്രശ്നമെന്നറിയാന്‍ സദാചാരപ്രതിസന്ധിയെക്കുറിച്ചു ഉത്കണ്ഠപ്പെടുന്നവര്‍ അവരുടെ സ്വാകാര്യജീവിതത്തിന്റെ ഷട്ടറുയര്‍ത്തി നോക്കിയാല്‍ മതി. അവരുടെ മനസാകുന്ന കുടുസു മുറിക്കുളളില്‍ ഒരു വേശ്യാഭോഗാസക്തി ചാരം മൂടിക്കിടപ്പുണ്ട്. തരം കിട്ടിയാല്‍... റഷീദിന് അല്പം മദ്യം അകത്തു ചെന്നപ്പോള്‍ വഴിയിരികില്‍ നിന്ന നിശാസുന്ദരിയില്‍ മോഹം. ആ റഷീദാണ് മകളെ നല്ലനടപ്പിനായി പ്രായമാകുംമുമ്പേ കെട്ടിക്കാന്‍ തീരുമാനിക്കുന്നത്.! സദാചാരത്തിന്റെ ഷട്ടര്‍ ഉയര്‍ത്തി നോക്കുകയാണ് ഈ സിനിമ. വെളിച്ചത്തിലെ യുവതയുടെ സാഹൃദവും ഇരുളിലെ ഥാഥാസ്ഥിതിക സദാചാരവും തുലാസിലിടാന്‍ സിനിമ തയ്യാറാകുന്നു.

സൗഹൃദത്തിന്റെ ഷട്ടര്‍

റഷീദിന് വൈകിട്ടു കൂടലുണ്ട്. ആത്മാര്‍ഥ ചങ്ങാതികള്‍. അവര്‍ക്കു എന്നും കൂടാതിരിക്കാനാകില്ല. ഒരു കടമുറിക്കുളളിലാണ് കുടി. തെരുവു പുറത്ത്. ഷട്ടര്‍ മുക്കാലും താഴ്ത്തി അകത്ത് വെളളമടി. ഇതാണ് മാന്യത. ആരും കാണുന്നില്ലല്ലോ? ഈ കുടിക്കൂട്ടായ്മില്‍ മറച്ചുവെക്കാനൊന്നുമില്ല. പെണ്ണിനെ വേട്ടയാടിയതും വിലപേശിയതുമെല്ലാം...തോരാ തോരാ അടിക്കുക.അടിച്ചു രസിക്കുക. അക്കൂട്ടത്തില്‍ മക്കളുടെ സന്മാര്‍ഗജീവിതത്തിനു വേണ്ടിയുളള വര്‍ത്തമാനങ്ങള്‍.!?

തരം കിട്ടിയപ്പോള്‍ ഒരു കൂട്ടുകാരന്‍ റഷീദിന്റെ വീട്ടിലെ കുളിമുറിക്കാഴ്ചക്കായി പതുങ്ങി പോകുന്നത് റഷീദ് കാണുന്നുണ്ട്. പക്ഷെ ഒന്നും ചെയ്യാനാകാത്ത നിസഹായാവസ്ഥയിലാണയാളപ്പോള്‍. ചങ്ങാതി കേള്‍ക്കുന്നില്ലെന്നു കരുതി പറയുന്നതെല്ലാം കേള്‍ക്കാനിട വരുമ്പോഴാണ് സൗഹൃദത്തിന്റെ തനി രൂപം മനസ്സിലാവുക. ഷട്ടറിട്ട മുറിക്കുളളിലിരുന്നു പുറത്തെ സൗഹൃദസത്യം മനസിലാക്കാന്‍ റഷീദിനു (ദൗര്‍)ഭാഗ്യമുണ്ടാകുന്നു. മനുഷ്യന്റെ അകവും പുറവും രണ്ടാണെന്ന സത്യം. അകം വൃത്തിയാക്കിയാലും വൃത്തിയാകുന്നില്ലെന്നു സിനിമയില്‍ വെളളത്താടിയുളള വൃദ്ധന്‍ പറയുന്നുണ്ടല്ലോ‍

ഷട്ടറിനകത്തു പെട്ട കഥ

സിനിമാ സംവിധായകനയ മനോഹരന് വീണ്ടും സിനിമാപിടുത്തത്തിന്റെ ഷട്ടര്‍ തുറക്കണമെന്നാഗ്രഹം. അയാളതിനു പലരുടേയും ഡേറ്റു ചോദിച്ചു നടക്കുകയാണ്. ഒരു ലൊക്കേഷനില്‍ നിന്നും ഓട്ടോയില്‍ കയറുന്ന മനോഹരന്റെ ബാഗ് നഷ്ടമാകുന്നു. ഈ ബാഗിലാണ് സിനിമയുടെ കഥയുളളത്. ഈ ബാഗ് ഓട്ടോ റിക്ഷക്കാരനിലൂടെ ഷട്ടറിട്ട കടയുടെ ഉളളില്‍ പെടുന്നു. ഷട്ടറിന്റെ താക്കോല്‍ കൈവശമുളളയാളെ മദ്യപിച്ചു വണ്ടിയോടിച്ചതിനു പോലീസ് പിടിച്ചകത്താക്കുന്നു. ആ സമയം ഷട്ടറിനകത്തുളളത് സദാചാരമാന്യന്‍, മനോഹരന്റെ കാമുകിയും മറ്റുളളവരുടെ വേശ്യയുമായ പെണ്ണ്.(അവള്‍ അത്തരക്കാരിയാണെന്നു മനോഹരനറിയില്ല). മനോഹരന്റെ സിനിമക്കഥ. ആ തിരക്കഥ അവള്‍ വായിക്കുന്നുമുണ്ട്. മനോഹരന് നഷ്ടപ്പെട്ട കഥ തിരിച്ചു കിട്ടണം. ആ ഉദ്യമത്തിന്റെ അവസാനം അകച്ചു പെട്ടവര്‍ക്കെന്ന പോലെ പുറത്തുളള അയാള്‍ക്കും ഷട്ടര്‍ തുറന്നു കിട്ടണം. പുറത്തു വരുന്നത് അയാളുടെ കാമുകിയുടെ ജീവിതം . ഷട്ടറിട്ടു നടക്കുകയാണ് പലരും.പൂട്ടു തുറക്കാനുളള താക്കോല് അജ്ഞാതകരങ്ങളിലാണല്ലോ? മനോഹരന്‍ കഥ വീണ്ടെടുക്കുകയല്ല കണ്ടെത്തുകയാണ്. അങ്ങനെ ഷട്ടര്‍ തുറക്കുന്നതില്‍ മനോഹരനും പങ്കാളിയായി.

ലൗവ് ഉളള ലൈംഗികത്തൊഴിലാളി

സ്വന്തമായി പേരില്ലാത്തവള്‍, അവളെ തങ്കമെന്നു വിളിച്ചോളൂ..തങ്കം എന്ന പെണ്ണ് ശരീരം കൊണ്ടു നേടുന്നതെന്താണ്? അവള്‍ ആ പണം തന്റെ സിനിമക്കാരനു നല്‍കുന്നു. സിനിമക്കാരനാകട്ടെ അവളുടെ നല്ല മനുഷ്യനാണ്. ദുരാഗ്രഹങ്ങളുടെ ബന്ധമല്ലത്. അയാള്‍ക്കു കുപ്പായം വാങ്ങിക്കൊടുക്കും. കുപ്പായം ഓര്‍മയുടെയും സ്നേഹത്തിന്റെയും സംരക്ഷണത്തിന്റെയും അടയാളമാണ്. പുതുവസ്ത്രങ്ങള്‍ പ്രിയപ്പെട്ടവര്‍ക്കുമാത്രമാണ് നാം നല്‍കുന്നത്. അങ്ങനെ മനോഹരനു വേണ്ടി വാങ്ങിയ കുപ്പായം അവള്‍ റഷീദിനു നല്‍കുന്നു.ഒരു രാത്രച്ചങ്ങാത്തം. സുര പണ്ടു പിമ്പായിരുന്ന വാസുവില്‍ നിന്നറിഞ്ഞ പെണ്ണുവിശേഷങ്ങളും സുഹൃത്തിന്റെ വീരേതിഹാസവും കേട്ട റഷീദിനു തെരുവില്‍ വശംകെട്ട നിലപുകണ്ടപ്പോഴേ മനസിളകി. അങ്ങനെയാണ് അവളെ കടമുറിക്കുളളിലെത്തിച്ചത്. ഷട്ടറിട്ടത്. അടുത്ത് വിളികേള്‍ക്കാവുന്ന ദൂരത്തില്‍ കാഴ്ചവട്ടത്തില്‍ സ്വന്തം വീട്. ഭാര്യ, മക്കള്‍. ഇപ്പുറം വേശ്യുടെ ശരീരം. റഷീദിന്റെ മനസു പിടഞ്ഞു. അയാള്‍ക്ക് അവളെ ഒന്നും ചെയ്യാന്‍ തോന്നിയില്ല എന്നു മാത്രമല്ല ആത്മസങ്കര്‍‌ഷത്തില്‍ പെട്ടു വെന്തു പോയി.അയാളിലെ നന്മ തിരിച്ചറിയുന്ന തങ്കം അയാള്‍ക്കു പുതുക്കുപ്പായം നല്കുമ്പോള്‍ അത് മറ്റൊരു നിഷ്കളങ്കപുരുഷനെ കണ്ടെത്തിയതിന്റെ ഇഷ്ടമുദ്രയാണെന്നു കരുതാം. ഉള്ളില്‍ നന്മയുംപ്രണയവും ഉളളവളാണവള്‍. സജിത മഠത്തില്‍ അനായാസം ഈ കഥാപാത്രത്തെ അവതരിപ്പിച്ചു. ഷട്ടര്‍ പുറത്തു നിന്നും പൂട്ടി താക്കേലുമായി പോയ സുര വരാതിരുന്നപ്പോള്‍ പുറത്തുപൊകാനാകാതെ അവര്‍ എലികളെപ്പോലെ ഷട്ടറിനുളളില്‍ പതുങ്ങിക്കഴിഞ്ഞപ്പോള്‍ സജിത ഒരു വേശ്യയുടെ ഭാവഭേദങ്ങളുടെ വൈശിഷ്ട്യം പ്രതിഫലിപ്പിക്കുക തന്നെ ചെയ്തു. ഷര്‍ട്ടല്ലേ കൊടുത്തുളളൂ. പൂക്കളാര്‍ക്കും കൊടുക്കാറില്ല എന്നു പറഞ്ഞ് മനോഹരമായി മനോഹരനില്‍ നിന്നും പിന്‍വാങ്ങുന്ന രംഗം വരെ ഈ നടി അഭിനയസാധ്യതയെല്ലാം സഫലമാക്കി.

വിശ്വസ്ത ചങ്ങാതി

നാടുനീളെ മറ്റുളളവരെ സഹായിക്കുന്നയാളാണ് സുര. പ്രതിസന്ധിയില്‍ പെട്ടപ്പട്ട സുരനോടു മനോഹരന്‍ ചോദിക്കുന്നു നിങ്ങള്‍ക്കു വിശ്വസിക്കാന്‍ കൊള്ളാവുന്ന ചങ്ങാതിമരാരെങ്കിലും ? അപ്പോഴാണ് സുരന്‍ തിരിച്ചറിയുന്നത് അങ്ങനെ ഒരാള്‍ ഇല്ലെന്ന്. റഷീദിനോടു തങ്കവും സമാനമായ ചോദ്യം ഉന്നയിക്കുന്നു .ഉത്തരം സമാനം തന്നെ. നഗരജീവിതത്തിലെ സൈഹൃദങ്ങളില്‍ നിന്നും വിശ്വസ്തരെ കണ്ടെത്താനാകാത്ത നിസഹായത ഒറ്റപ്പെട്ടവരുടെ കൂട്ടവും കൂടലുമായി നഗരത്തെ ലേബലു ചെയ്യുന്നു. ഏതു പ്രതിസന്ധിയിലും താങ്ങാവുന്ന ഒരാള്‍ നമ്മള്‍ക്കുമില്ലേ എന്നു ചോദിക്കുകയാണ് ..

വ്യത്യസ്തമായ കഥ പറയാന്‍ ശ്രമിച്ചു. നല്ല നടീനടന്മാരെ പരമാവധി പ്രയോജനപ്പെടുത്തിയതും സംഭാഷണത്തിലെ ഔചിത്യവും എടുത്തു പറയാം.

ശബ്ദം, വെളിച്ചം എന്നിവയുടെ കാര്യത്തില്‍ എനിക്ക് അസ്വാഭാവികത അനുഭവപ്പെട്ടു. കടയുടെ അകത്ത് പിടിക്കപ്പെട്ടാല്‍ മാനം പൊളിയുന്ന മാന്യനും വേശ്യയും കുടുങ്ങി.പാതിരാ സമയം. തൊട്ടടുത്തു ഉടമയുടെ വീട്.അവിടെ ഭാര്യ. കുടുങ്ങിപ്പോയ സദാചാരം കമ്പിവെച്ചു കടയുടെ ഷട്ടര്‍ കുത്തിപ്പൊളിക്കാന്‍ ശ്രമിക്കുന്നു.ശബ്ദത്തിന്റെ തീവ്രതയെക്കുറിച്ച് സഞ്ചാരദൂരത്തെക്കുറിച്ച് ഒരു വിവരവുമില്ലാത്തവരോ ഈ സിനിമയുടെ അണിയറശില്പികള്‍? വര്‍ത്തമാനം പറച്ചിലിനും മയമില്ല. അല്പം കൂടി ശ്രദ്ധിച്ചിരുന്നെങ്കില്‍ പതിഞ്ഞ സ്വരത്തില്‍ വര്‍ത്തമാനിപ്പിച്ചിരുന്നെങ്കില്‍. പകലും സ്ഥിതി മാറിയില്ല. അടീം പീടീം. പാട്ടകള്‍ മറിച്ചിടീലും എല്ലാം..

ഒരു ചെറിയ വെന്റലേറ്റര്‍ മാത്രമുളള ഒറ്റമുറിക്കടയുടെ ഉള്‍വശം പകലു പോലും ഇരുട്ടായിരിക്കുമെന്ന് നമ്മുടെ അനുഭവം. പിന്നെ രാത്രിയില്‍ പറയാനുണ്ടോ? ഇവിടെ അടച്ചിട്ട കടമുറിയില്‍ പാതിരാവിലും നല്ല വെളിച്ചം വേണമെങ്കില്‍ എലിയെ വരെ കാണാവുന്നത്ര. കമ്പനി കൂടി വെളളമടിച്ചു പൂസായ റഷീദ് വീണ്ടും വെളളമടിക്കാന്‍ പുറപ്പെടുന്നു. പക്ഷെ തുടര്‍ന്നുളള രംഗങ്ങളിലൊന്നും നേരത്തെ വെളളമടിച്ചതിന്റെ യാതൊരു ഇഫക്ടുമില്ല! സുരയും മോന്തിയിരുന്നു. അതും ശരീരത്തില്‍ പിടിച്ചില്ലെന്നോ?

അവാര്‍ഡു കിട്ടിയില്ലേ കിട്ടിയില്ലേ എന്നു വിലപിക്കുന്ന സംവിധായകന്‍ മനസിലാക്കണം ഈ പടം അതിനു പോരാ.ആഗ്രഹിക്കാനുളള അവകാശത്തെ മാനിക്കുന്നു. സിനിമ മോശമാണെന്നഭിപ്രായവുമില്ല. 

ജീവിതത്തിന്റെ സങ്കീര്‍ണതകളില്‍ ശരിയും തെറ്റും വേര്‍തിരിച്ചെടുക്കാന്‍ പ്രയാസമാണെന്ന് ഷട്ടര്‍ സൂചിപ്പിക്കുന്നു, മനുഷ്യര്‍ എലികളാകുന്ന അവസ്ഥയുടെ മറ്റരാഖ്യാനം.

സംവിധാനം	ജോയ് മാത്യു

നിര്‍മ്മാണം	സരിത ആന്‍ തോമസ്

രചന	ജോയ് മാത്യു

ഛായാഗ്രഹണം	ഹരി നായര്‍

ചിത്രസംയോജനം	ബിജിത് ബാല

അഭിനേതാക്കള്‍

• ലാൽ – റഷീദ്
• ശ്രീനിവാസൻ – മനോഹരൻ
• വിനയ് ഫോർട്ട് – നന്മറയിൽ സുരൻ
• സജിത മഠത്തിൽ – വേശ്യ
• റിയ സൈറ – റഷീദിന്റെ മകൾ
• നിഷ ജോസഫ് – റഷീദിന്റെ ഭാര്യ
• അഗസ്റ്റിൻ
• പ്രേം കുമാർ
• വിജയൻ കാരന്തൂർ
• അപ്പുണ്ണി ശശി

മതിലുകളും ജീവിതവും

അധികാരം, വിശ്വസ്തത, സൗഹൃദം, ജനതയുടെ സ്വാതന്ത്ര്യം, രാഷ്ട്രീയം, വ്യക്തിയും വ്യക്തിബന്ധവും അതിനുളളിലെ സ്വാതന്ത്ര്യവും, സ്വകാര്യതയും ഭരണകൂടവും, വിധേയത്വ രൂപീകരണം തുടങ്ങി പലമാനങ്ങളില്‍ കാണാന് കഴിയുന്നതാണ് Lives of others എന്ന സിനിമ. ശ്രദ്ധേയമായ ഒതുക്കം ഈ സിനിമയുടെ പ്രത്യേകതയാണ്.
http://www.youtube.com/watch?v=n3_iLOp6IhM

(പശ്ചാത്തലം.1984.

ജര്‍മന്‍ ജനാധിപത്യ റിപ്പബ്ലിക് എന്ന ഒരു രാജ്യം ചരിത്രത്തിലുണ്ട്.

യുദ്ധനേട്ടം വീതിച്ചെടുത്തപ്പോള്‍ കമ്മൂണിസ്റ്റ് റഷ്യയ്ക്കു കിട്ടിയ പങ്ക്. പരാജിതരുടെ സമ്പത്ത് പങ്കിട്ടെടുക്കുന്നതില്‍ മുതലാളിത്വവും കമ്മ്യൂണിസവും ഒരേ പോലെ മനസ്സു ഐക്യപ്പെട്ടു.

അങ്ങനെ ജനതയുടെ ആഗ്രഹത്തിന്റെ അടിത്തറയില്ലാതെ ഒരു രാജ്യം കമ്മ്യൂണിസ്റ്റ് ചുവപ്പണിഞ്ഞു. ജനങ്ങളുടെ അതൃപ്തി അവരുടെ ജീവിതാനുഭവങ്ങളില്‍ നിന്നും പൊട്ടി മുളയ്ക്കുന്നതാണ്. സൗഭാഗ്യം അപ്പുറത്താണെന്ന തോന്നലുണ്ടായാല്‍ ഇപ്പുറം സ്വയം നവീകരിക്കുന്നതിനു പകരം മതിലുകൊണ്ടു മറതീര്‍ത്താലതു തടവാകുകയേ ഉളളൂ എന്നു ചരിത്രം ചൂണ്ടിക്കാട്ടും. സ്വാതന്ത്ര്യം അതു വലുതാണ്. കമ്മ്യൂണിസ്റ്റ് ഭരണാധികാരികള്‍ പലപ്പോഴും ജനതയുടെ സ്വാതന്ത്ര്യത്തെ പാര്‍ട്ടിയുടെ സ്വാതന്ത്ര്യത്തിനു കീഴില്‍ പ്രതിഷ്ഠിക്കാന്‍ ശ്രമിച്ചു. ചവിട്ടിപ്പിടിച്ചു നില്‍ക്കുന്നവ ഉയിര്‍ത്തെഴുന്നേറ്റാല്‍ അടിപതറുമെന്ന അനുഭവത്തിലൂടെ മനസ്സിലാക്കാം. പക്ഷെ പിന്നെ ഒന്നും ചെയ്യാന്‍ പറ്റാത്തവിധം ദാരുണമായിരിക്കും സ്ഥിതി.)

സിനിമയെക്കുറിച്ച് പറയും മുമ്പ് ഇത്രയും ആമുഖം ആവശ്യം.

മറ്റുളളവരുടെ ജീവിതം ( Lives of others ) പഴയ ജര്‍മന്‍ ജനാധിപത്യ റിപ്പബ്ലിക്കിലാണ് ആരംഭിക്കുന്നത്.

1.

ജോര്‍ജ് ഡ്രെയ്മാന്‍ പ്രശസ്തനും അനുഗ്രഹീതനുമായ എഴുത്തുകാരനാണ്. അയാള്‍ക്കൊപ്പം പെണ്‍സുഹൃത്ത് ക്രിസ്റ്റ മരിയ താമസിക്കുന്നു. അവള്‍ സുന്ദരി.നടി. അയാളുടെ നാടകത്തിലെ പ്രധാന അഭിനേത്രി. മറയില്ലാത്ത സൗഹൃദത്തിന്റെ അത്യുന്നതിയിലാണിരുവരും. ഒറ്റ ജീവിതമാണവരുടേതെന്നു പറയാം.

( നടിക്കുക, ജീവിക്കുക എന്നിവയെ മുഖാമുഖം നിര്‍ത്തുന്ന സിനിമയാണിത്)

2.

ഭരണകൂടം ജോര്‍ജിനെ സംശയിക്കുന്നു. ഭരണകൂടതാല്പര്യങ്ങള്‍ക്കെതിരാണ് ജോര്‍ജെന്നു കരുതുന്നു. നീക്കങ്ങള്‍ നിരീക്ഷിക്കാന്‍ വെയ്സ്ലര്‍ എന്ന രഹസ്യപ്പോലീസുകാരനെ നിയോഗിക്കുന്നു. അയാളാകട്ടെ ജോര്‍ജിന്റെ വീട്ടിലെ ഉറുമ്പനക്കം പോലും കാണാനും കേള്‍ക്കാനും കഴിയും വിധം ഇലക്ട്രോണ്ക് സംവിധാനം ജോര്‍ജറിയാതെ ഘടിപ്പിക്കുകയും എല്ലാം തത്സമയം രേഖപ്പെടുത്തി റിപ്പോര്‍ട്ടു നല്‍കുകയും ചെയ്യുന്നു

( ഭരണകൂടം എങ്ങനെ വ്യക്തികളുടെ സ്വകാര്യതിയില്‍ അദൃശ്യമായി ഇടപെടുന്നു എന്നു വ്യക്തമാക്കുന്നതാണ് ഈ ചാരപ്പണിക്കാഴ്ചകള്‍. )

3.

രാജ്യത്തെ സാംസ്കാരിക മന്ത്രി ഹെംമ്പ്ഫ് . അയാള്‍ ക്രിസ്റ്റയില്‍ അനുരക്തനാകുന്നു. സമ്മര്‍ദ്ദത്തില്‍പ്പെട്ട അവള്‍ തണുത്ത മനസ്സോടെ അയാളുടെ കൂടെ വേഴ്ചയ്ക്ക് സന്നദ്ധയാകുന്നു. ( സാംസ്കാരിക മന്ത്രിയുടെ ചുമതലയാണല്ലോ സാംസ്കാരികപ്രവര്‍ത്തകരെ വേണ്ടവിധം നോക്കുക എന്നത്..!?)

4.

അവളുടെ യാത്രാരഹസ്യം മനസ്സിലാക്കുന്ന ജോര്ജ് ഒരു തവണ അവളോടു പറയുന്നു നീ പോകുന്നതെന്തിനെന്നെനിക്കറിയാം.പോകാതിരിക്കണം. അവള്‍ അന്നും പോയി. അവള്‍ തിരികെ വരുമ്പോള്‍ നിഷ്കളങ്കതയോടെ പഴയതില്‍ നിന്നും ഒരു വ്യത്യാസവും വരുത്താതെ ജോര്‍ജ് അവളോടു പെരുമാറുന്നു. അയാള്‍ എഴുത്തുകാരനെന്ന നിലയിലുളള ഉന്നതമായ വ്യക്തിത്വം പ്രകടിപ്പിക്കുന്നുവെന്നു പറഞ്ഞാലതതിശോക്തിയാകില്ല. അതു പോലെ സ്വാതന്ത്ര്യവാദിയായ എഴുത്തുകാരന് വ്യക്തിസ്വാതന്ത്ര്യത്തെ നിഷേധിക്കാനാകുമോ?

(പല ചോദ്യങ്ങള്‍ ഉയര്‍ത്തുന്നതാണ് ഈ അസാധാരണ ബന്ധം)

മന്ത്രിപ്പണി പല ഉര്‍ന്ന ഉദ്യോഗസ്ഥര്‍ക്കുമറിയാമെങ്കിലും അവരുടെ വിധേയത്വം മൂലം അത് നിസാരവത്കരിക്കപ്പെടുന്നു.

5

രാജ്യത്തെ ബുദ്ധിജീവികള്‍ അസംതൃപതരാണ്. അവരില്‍ ചിലര്‍ ആത്മഹത്യ ചെയ്യുന്നു. ജോര്‍ജും കൂട്ടരും പ്രതികരിക്കുന്നതിനുളള മാര്‍ഗങ്ങളാലോചിക്കുന്നു.

6

വെയ്സലര്‍ എന്ന ചാരപ്പോലീസുകാരന്‍ ജോര്‍ജിന്റെ ജിവിതത്തിന്റെ ഓരോ നിമിഷവും റിക്കാര്‍ഡു ചെയ്യുകയാണ്. ക്രമേണ ജോര്‍ജിന്റെ നിഷ്കളങ്കതയും സര്‍ഗാത്മകതയും വിസ്വസ്തതയും പ്രതിബദ്ധതയും ചാരപ്പോലീസുകാരനെ സ്വാധീനിക്കുന്നു. അതു കൊണ്ടു തന്നെ ജോര്‍ജിനു ഒരു ഇറക്കുമതി ചെയ്ത ,പുസ്തകവലിപ്പം മാത്രമുളള ടൈപ് റൈറ്ററ്‍ ലഭിക്കുന്നിടം മുതലുളള സുപ്രധാനവിവരങ്ങള്‍ അയാള്‍ മേളധികാരികള്‍ക്കു നല്കുന്നില്ല. ഭാവനയില്‍ കുരുത്ത റിപ്പോര്‍ട്ടുകളാണ് തുടര്‍ന്നു നല്‍കുന്നത്. ക്രിസ്റ്റിയുടെ പോക്കില്‍ വെയ്സലര്‍ അസംന്തുഷ്ടനാകുന്നു. അത്രയ്ക്ക് അയാള്‍ ജോര്‍ജിന്റെ ആരാധകനാകുന്നുവെന്നു സാരം. ക്രിസ്റ്റയെ ഒരു ഷോപ്പില്‍ വെച്ച് പരിചയപ്പെടുന്ന വെയ്സലര്‍ അവളെ പരോക്ഷമായി പിന്തിരിപ്പിക്കാന്‍ ശ്രമിക്കുന്നുണ്ട്.

7

രാജ്യത്തെ ആഭ്യന്തരവിശേഷങ്ങള്‍ എങ്ങനെയോ പുറം ലോകത്തെത്തുന്നു. ഭരണകൂടം അസ്വസ്ഥമാകുന്നു. ആരാണിതിനു പിന്നില്‍? ഇറക്കുമതി ചെയ്ത ടൈപ് റൈറ്ററില്‍ തയ്യാറാക്കിയ മാറ്ററാണ് പുറത്തുപോയത് എന്നു വരെ രഹസ്യാന്വേഷണ വിഭാഗം കണ്ടെത്തുന്നു. സംശയത്തിന്റെ മുന ജോര്‍ജിലേക്കു നീളുന്നു.

8

ജോര്‍ജിന്റെ വീട്ടില്‍ റെയ്ഡ് നടക്കുന്നു. അവര്‍ക്ക് തെളിവുകള്‍ കിട്ടുന്നില്ല. സാംസ്കാരികചങ്ങാതിമാര്‍ ക്രിസ്റ്റയില്‍ നിന്നും വിവരം ചോരാനുളള സാധ്യത ചൂണ്ടിക്കാട്ടുമ്പോള്‍ ജോര്‍ജിനു അവള്‍ ഒരിക്കലുമങ്ങനെ ചെയ്യില്ലെന്നുറപ്പുണ്ട്.

9

സാംസ്കാരിക മന്ത്രി ക്രിസ്റ്റയുമായുളള ബന്ധം കേസന്വേഷണത്തിനു തടസ്സമാക്കേണ്ടതില്ലെന്നും അവളെ അറസ്റ്റ് ചെയ്തു വേണ്ടരീതിയില്‍ പെരുമാറി വിവരം ചോര്‍ത്താനും നിര്‍ദ്ദേശം കൊടുക്കുന്നു. ( അധികാരം, പെണ്ണ് എന്നിവയുടെ മുന്‍ഗണന നിശ്ചയിക്കേണ്ടിവരുന്ന സന്ദര്‍ഭത്തെ മാനസികസംഘര്‍ഷങ്ങളില്ലാതെ ലാഘവത്തോടെ കൈകാര്യം ചെയ്യുന്ന രീതി ലോകത്തിന് പുതുമയുളളതല്ലെന്ന് ഒരിക്കല്‍ കൂടി ഓര്‍മിപ്പിക്കുകയാണിവിടെ)

ക്രിസ്റ്റ അറസ്റ്റ് ചെയ്യപ്പെടുന്നു.

10

ക്രിസ്റ്റയെ ചോദ്യം ചെയ്യാന്‍ വെയ്സലര്‍ നിയോഗിക്കപ്പെടുന്നു. അയാളെ അവള്‍ ഓര്‍മിക്കുന്നു. രാജ്യം. അവളുടെ കഴിവ്, അവളുടെ ഭാവി സാധ്യതകള്‍..എല്ലാം വലുതാണ്.കുറുക്കന്‍ തന്ത്രങ്ങളില്‍ അവള്‍ വീഴുന്നു. രണ്ടു മുറികളുടെ ഇടയില്‍ തറയിലാണ് ആ ടൈപ്പ്റൈറ്റര്‍ എന്ന് അവള്‍ ഒറ്റുകൊടുക്കുന്നു. അവളെ മോചിപ്പിക്കുക മാത്രമല്ല പാരിതോഷികം നല്‍കാനും രഹസ്യപ്പോലീസ് വിഭാഗം സന്നദ്ധമാകുന്നു.

11.

അവള്‍ വീട്ടിലെത്തുന്നു. കുളിക്കണം. ( കുളിയുടെ രംഗങ്ങള്‍ പലതവണയുണ്ട്. മന്ത്രിയുമായുളള വേഴ്ചക്കു ശേഷം സ്വയം മലിനപ്പെട്ടെന്നു തോന്നുന്ന അവള്‍ കുളിമുറിയില്‍ വിതുമ്പുന്ന രംഗം. ഇത്തവണ സോപ്പ് എടുത്തു നല്കുന്നതിന് ജോര്‍ജിനോടവള്‍ ആവശ്യപ്പെടുന്നു. വളരെ ഔചിത്യപൂര്‍വം അവളുടെ മനസ് ചിത്രീകരിക്കുന്നതിനിവിടെ കഴിഞ്ഞു. ) കുളിയാരംഭിക്കേ പോലീസ് വീടു വളയുന്നു. തറയിലെ പലകയുടെ ഇളക്കം പരിശോധിക്കാന്‍ തുടങ്ങുമ്പോള്‍ ക്രിസ്ററ കുളികഴിഞ്ഞെത്തുന്നു. ജോര്‍ജ് പിടിക്കപ്പെടാന്‍ പോകുന്ന നിമിഷം! ജോര്‍ജ് അവളെ നോക്കുന്നു. അവള്‍ മനസ്സംഘര്‍ഷത്താല്‍ നിയന്ത്രണം വിട്ട് പുറത്തോക്കോടി പാഞ്ഞു വരുന്ന വാഹനത്തിനു മുന്നില്‍ ചാടി ആത്മഹത്യ ചെയ്യുന്നു. ജോര്‍ജ് ഓടി വന്നവളെ വാരിയെടുത്ത് വിലപിക്കുന്നു.

13

തറയിലെ പലകയുടെ അടിയില്‍ ആ ടൈപ് റൈറ്റര്‍ ഉണ്ടായിരുന്നില്ല. അത് ആരാധകനായ ചാരപ്പോലീസ് വെയ്സലര്‍ നേരത്തെ നീക്കം ചെയ്തിരുന്നു. അയാളാണല്ലോ അവളെ ചോദ്യം ചെയ്തത്. അയാള്‍ക്കറിവുളള കാര്യുമണത്. തുടരന്നുണ്ടാകാനിടയുളള റെയിഡിനെ പ്രവചിക്കാനും വെയ്സനര്‍ക്കു കഴിയും.

(വെയ്സലര്‍, ക്രിസ്റ്റ ഈ രണ്ടു പേരെ മുമ്പില്‍ നിറുത്തി വിശ്വസ്തത എന്താണെന്ന ഒരു ചോദ്യം സിനിമ ഉന്നയിക്കുന്നു.)

എന്തെല്ലാം മറകളാണ് തകരുന്നത്. ബര്‍ലിന്‍ മതിലും പിടിച്ചു നിന്നില്ല. പുതിയ സമൂഹം .അപ്പോള്‍ ജോര്‍ജ് രഹസ്യരേഖകള്‍ വായിക്കുന്നതിനു അവസരം കിട്ടുന്നു. അവസാനറിപ്പോര്‍ട്ടിലെ വിരലടയാളം ടൈപ്പ്റൈറ്റര്‍ മഷിയില്‍ മുക്കിയത്. അതു ജോര്‍ജിനു പരിചിതമായ മഷിതന്നെ.അജ്‍‍ഞാതനായ ആ രഹസ്യപ്പോലീസുകാരന്‍...രഹസ്യത്തിന്റെ കയ്യൊപ്പ്.

13

ജോര്‍ജിന്റെ അടുത്ത പുസ്തകം ബുക്ക സ്റ്റാളില്‍.

ആ പരസ്യം വെയ്സലര്‍ കണ്ടു കടയില്‍ കയറി പുസ്തകം വാങ്ങി ആദ്യ പേജ് മറിച്ചു .അതു സമര്‍പ്പിച്ചിരിക്കുന്നത്.-"HGW XX/7" ന്.

അതാണല്ലോ വെയ്സലറുടെ ചാരപ്പേര്.

http://ia.media-imdb.com/images/M/MV5BNDUzNjYwNDYyNl5BMl5BanBnXkFtZTcwNjU3ODQ0MQ@@._V1_SX214_.jpg

Directed by	Florian Henckel von Donnersmarck
Produced by	Max Wiedemann Quirin Berg Dirk Hamm
Written by	Florian Henckel von Donnersmarck
Starring	Ulrich Mühe Martina Gedeck Sebastian Koch Ulrich Tukur
Music by	Gabriel Yared Stéphane Moucha
Cinematography	Hagen Bogdanski
Editing by	Patricia Rommel
Studio	Wiedemann & Berg Bayerischer Rundfunk ARTE Creado Film
Distributed by	Buena Vista International(Germany) Sony Pictures Classics
Release date(s)	23 March 2006
Running time	138 minutes
Country	Germany
Language	German
Budget	$2 million

.

വിശ്വരൂപവ‍ഞ്ചനയും കമലാഹാസനും

       ഒരു സിനിമ ശ്രദ്ധിക്കപ്പെടേണ്ടത് അതിന്റെ കലാമൂല്യം കൊണ്ടാകണം. കലാമൂല്യം കുടികൊളളുന്നത് അതിന്റെ പ്രമേയം,അഭിനയം, സംവിധാനം, ഛായാഗ്രഹണം, ദൃശ്യഭാഷയുടെ കാവ്യാത്മകത തുടങ്ങിയ ഒട്ടേറെ ഘടകങ്ങളിലാണ്. ഏതൊരു അളവു കോലുവെച്ചു പരിശോധിച്ചാലും വിശ്വരൂപം മൂന്നാം കിട തറസിനിമയാണെന്നു കാണാന്‍ കഴിയും. ഒരു കൂട്ടം വര്‍ഗീയവാദികള്‍ അനവസരത്തില്‍ കലാപഭീഷണി മുഴക്കിയില്ലായിരുന്നെങ്കില്‍ ഈ സിനിമയുടെ ഗതി വേറൊന്നായേനേ.( ആവിഷ്കാരസ്വാതന്ത്ര്യത്തിന്റെ പേരില്‍ മാത്രമേ വിശ്വരൂപപ്രദര്‍ശനം ന്യായീകരിക്കപ്പെടാവൂ )

കമലാഹാസന്‍ ഗുജറാത്ത് കലാപത്തില്‍ മതനിരപേക്ഷനിലപാട് സ്വീകരിച്ചു എന്ന ഒറ്റക്കാരണം ഈ സിനിമയെ ന്യായീകരിക്കാന്‍ തക്ക ശക്തമായ വാദമല്ല. സിനിമ മുസ്ലീം വിരുദ്ധമായ ആശയം സംപ്രേഷണം ചെയ്യുന്നുണ്ട് എന്നാണ് ഈ സിനിമ എനിക്കു നല്‍കിയ പാഠം.

നിസ്കാരം ഭീകരവാദചിഹ്നമാണോ? അറബിഭാഷ സമം ഭീകരവാദം എന്നു ആരാണ് പഠിപ്പിക്കാന്‍ ശ്രമിക്കുന്നത്? കമലിന്റെ വിശ്വരൂപത്തില്‍ വീണ്ടും വീണ്ടും നിസ്കരിക്കുന്ന രംഗങ്ങള്‍, വിശ്വരൂപമെന്ന പേരിന്റെ എഴുത്തു രീതി, ഒരു വിഭാഗത്തിനെ പ്രതിക്കൂട്ടിലാക്കുന്ന ട്രീറ്റ്മെന്റ് ഇവ മുസ്ലീംവിരുദ്ധവര്‍ഗീയവാദികളെ സുഖിപ്പിക്കും. ഗുജറാത്ത് വംശഹത്യക്കെതിരേ നിലപാടെടുത്ത ഒരാള്‍ നിര്‍മിച്ച ചിത്രം എന്നു വിശ്വസിക്കാന്‍ പ്രയാസം. മരുപ്രദേശങ്ങളില്‍ അതിശ്രേഷ്ടമായ നിറമാണ് പച്ച. പച്ചയെ മതചിഹ്നമാക്കുന്നതിനെ എതിര്‍ക്കപ്പെടേണ്ടതല്ല മാനിക്കേണ്ടതാണ്. പച്ചയുടെ മതം നമ്മളിലുണ്ട്.അതു ഹരിതബോധമാണ്. പച്ച വര്‍ഗീയതയുടെ ചിഹ്നമല്ല. പ്രാര്‍ഥന ഭീകരവാദചിഹ്നവുമല്ല. ചിഹ്നങ്ങളുടെ അര്‍ഥന്യൂനീകരണപ്രക്രിയയാണ് ഈ സിനിമ കൈകാര്യം ചെയ്യുന്നത്.

അഫഗാന്‍ പശ്ചാത്തലത്തില്‍ ആമേരിക്കന്‍ സാമ്രാജ്യത്വവും താലിബാന്‍ ഭികരവാദവും നിലനില്‍ക്കുമ്പോള്‍ ഏകപക്ഷീയമായി സാമ്രാജ്യത്വപക്ഷ സമീപനം സ്വീകരിക്കുന്നത് എത്രമാത്രം ശരിയാണ്? വിമര്‍ശനാതീതമാണ് അമേരിക്ക എന്ന നിലപാട് വളര്‍ത്താമോ? ഈ സിനിമയില്‍ അമേരിക്കക്കെതിരേ ഭീകരരവാദികള്‍ വെടിയുതിര്‍ക്കുന്ന ഒരു രംഗമുണ്ട്. അമേരിക്കന്‍ പ്രസിഡന്ററ്റിന്റെ ചിത്രം അതിന്റെ കണ്ണില്‍ വടിയുണ്ട തുളച്ചു കയറുമ്പോള്‍ വെളിച്ചം വെടിയുതിര്‍ക്കുന്നവരുടെ നേരേ വരുന്ന ആ രംഗം എങ്ങനെ വ്യാഖ്യാനിക്കും? മറ്റൊരു സന്ദര്‍ഭത്തിലും അമേരിക്കന്‍പൊയ്മുഖങ്ങളെ ലക്ഷ്യമാക്കി ആയുധപരിശീലനം നടത്തി ആഹ്ലാദിക്കുന്ന ഭീകരവാദികളെ കാണിക്കുന്നു. അമേരിക്ക രക്ഷകരായി എത്തുന്ന വേട്ടയുടെ നിരവധിദൃശ്യങ്ങളും .ഭീകരവാദവിരുദ്ധം എന്നാല്‍ സാമ്രാജ്യത്വദാസ്യം എന്നല്ലല്ലോ. അമേരിക്കയാണ് എറ്റവും വലിയ ഭീകരവാദി എന്നിരിക്കേ എന്തിനാണ് കമലാഹാസന്‍ അവരെ വെളളപൂശുന്നത്? ലോകരക്ഷകരായി അവരെ അവതരിപ്പിക്കുന്നത്? ഈ കാഴ്ചപ്പാട് സമര്‍ഥമായി വിനിമയം ചെയ്യുന്ന സിനിമയുടെ ഉളളടക്കത്തിന്റെ വിശ്വരൂപം കാണാതെ ഇടതുപക്ഷം അന്ധമായി ന്യായീകരിക്കരുത്.( വീണ്ടും പറയട്ടെ സിനിമ തടഞ്ഞവര്‍ സിനിമ കാണാതെ അങ്ങനെ ചെയ്തു എന്ന തെറ്റും സിനിമയുടെ ആശയതലത്തെ സംവാദാത്മകമായി എതിര്‍ത്തില്ല എന്ന വീഴ്ചയും കായികബലത്തിന്റെ ഭാഷയും സ്വീകരിച്ചു എന്നതും എതിര്‍ക്കപ്പെടണം. അതേ പൊലെ പൗരസമൂഹത്തില്‍ നിന്നും വിമര്‍ശനമുണ്ടായപ്പോള്‍ വൈകാരികമായ സമീപനം വെടിഞ്ഞ് വിവേകവും ഔചിത്യവും പ്രകടിപ്പിച്ച് സമരത്തില്‍ നിന്നും പിന്തിരിഞ്ഞതിനെയും വിലയിരുത്തണം. തിരിച്ചറിവിന്റെ പാതയില്‍ അണിനിരന്നാല്‍ പിന്നെ സിനിമ സമചിത്തതയോടെ വിമര്‍ശിക്കപ്പെടണം. വീണ്ടും വര്‍ഗിയവാദികളെ ഫോക്കസ് ചെയ്യുകയല്ല വേണ്ടത് എന്നു തോന്നുന്നു.ശുഭലക്ഷണങ്ങള്‍ കണ്ടതിനു ശേഷം അശുഭസമീപനം പാടില്ല എന്നതെല്ലാവര്‍ക്കും ബാധകമാകണം)സിനിമാപ്രദര്‍ശനപ്രതിസന്ധിയും സിനിമയുടെ വിചാരണയും വേറിട്ടു കാണണം.

ഭീകരവാദി വികലാംഗനാണ്.ജന്മസിദ്ധമല്ല കര്മസിദ്ധമാണത്. വൈകല്യം വീക്ഷണത്തിന്റേതാണ്. പാര്‍ശ്വവീക്ഷണമുളളവര്‍ക്കു മാത്രമേ മനുഷ്യരാശിയില്‍ തുടിക്കുന്ന ജീവചൈതന്യത്തിന്റെ ആന്തരികസത്യം കാണാതിരിക്കാനാകൂ. ഈ സിനിമയിലെ ഭീകരവാദിയുടെ നഷ്ടപ്പെടുന്ന ഇടംകണ്ണും പകരം വെക്കുന്ന പൊയ്ക്കണ്ണിനും അതേ പോലെ ഇറച്ചിക്കടയെ ലൊക്കേഷനാക്കി ഭീകരവാദത്തെ പരിചയപ്പെടുത്തുന്നതിനും വലിയ കലാമൂല്യം അവകാശപ്പെടാനാകില്ല. ഒരു ചെറിയ കുട്ടിയുടെ കണ്ണു കെട്ടി ആയുധങ്ങളുടെ തിരിച്ചറിവു പരിശോധിക്കുന്ന രംഗവും അതിനുശേഷം വെടിവെക്കുക എന്നത് കളിയും തമാശയമായി ജീവിതത്തിലേക്കു പകരുന്ന ദൃശ്യങ്ങളും കണിക്കുന്നു . കളിയും കാര്യവും തമ്മില്‍ ഭേദമുണ്ട് .ആശയപരമായ ആയുധപരിശീനമാണ് മതമൂല്യങ്ങള്‍ ത്യജിച്ച് സഹോദരവീക്ഷണം വെടിഞ്ഞ് ഭീകരവാദക്കുപ്പായമിടാന്‍ കുട്ടി മനസ്സുകളെ പ്രേരിപ്പിക്കുന്നത്.അതു വിനിമയം ചെയ്യാന്‍ സംവിധായകന്‍ മടിച്ചു. (ബുദ്ധ കൊളാപ്സ്ഡ് എന്ന സിനിമയില്‍ കുട്ടികളില്‍ മതമൗലികവാദഭീകരാശയബോധം രൂപപ്പെടുന്ന ഭീകരത അവതരിപ്പിക്കുന്നത് പ്രേക്ഷകരെ ചിന്തിപ്പിക്കും .ഇവിടെ ചിന്താരഹിത കാഴ്ച മാത്രം.) ഉപരിപ്ലവമായ വിശകലന രീതി പിന്തുടരുന്ന സിനിമ ചോദിക്കുന്നു ഭീകരവാദിയാകുന്നത് എങ്ങനെ? ആക്രമണവിധേയമായി മരണപ്പെട്ടവരെ കാണുന്ന ഒരു കൗമാരക്കാരന്‍. അവന്റെ മനസ് കലങ്ങുന്നു പിന്നീടവന്‍ ചാവേറാകുന്നു. എത്ര ലളിതമായ പ്രക്രിയ. ഇങ്ങനെയാണോ ഭീകരവാദികള്‍ രൂപപ്പെടുന്നത്?രക്ഷക ശിക്ഷക/നായക പ്രതിനായക സങ്കല്പത്തില്‍ വാര്‍ത്തെടുക്കുന്ന ജെയിംസ് ബോണ്ട് ചിത്രങ്ങളുടെ വികൃതമായ അനുകരണം എന്നതില്‍ കവിഞ്ഞ് മനസ്സിനെ സ്പര്‍ശിക്കുന്ന ലോകസമാധാനകാംക്ഷികളേയും മതനിരപേക്ഷവിശ്വാസികളെയും നല്ല മതവിശ്വാസികളേയും ജനാധിപത്യവാദികളേയും എന്തിനു മനുഷ്യരെ സ്വാധീനിക്കാന്‍ പോകുന്ന ഒന്നും ഇതിലില്ല. സിനിമയെ കലാപരമായ കലാപമായി കാണുന്നവരും നിരാശപ്പെടും. താലിബനിസത്തിനെ എതിര്‍ക്കപ്പെടണം.അതു സൂക്ഷമതയോടെ കൈകാര്യം ചെയ്തില്ലെങ്കില്‍ മുസ്ലീംവിരുദ്ധമനോഭാവമുളളവരെ സിനിമ സന്തോഷിപ്പിക്കും. അതാണിതന്റെ അപകടം എന്നു ഞാന്‍ കരുതുന്നു. ഭീകരവാദം, രാഷ്ട്രീയാധികാരം പിടിച്ചെടുക്കാന്‍ മതം ശ്രമിക്കുന്നതിലൂടെ വളര്‍ന്നു വരുന്നതാണെങ്കില്‍ മതഭീകരവാദമാണ്. അധികാരവും മതവും തമ്മിലുളള ഈ ബന്ധം വിശകലനം ചെയ്യപ്പെടണം. മതം അതിന്റെ മൗലികയുടെ പേരില്‍ പൗരാവകാശങ്ങള്‍ ലംഘിക്കുകന്ന ദുഷ്കര്‍മങ്ങള്‍ അടിച്ചേല്‍പ്പിക്കുമ്പോള്‍ അതു മതമൗലികവാദമാണ്. ഇവ രണ്ടും ചേരുന്ന സന്ദര്‍ഭത്തെ മതപരമായ വിശ്വാസപ്രശ്നം മാത്രമായാണോ കാണേണ്ടത്. അല്ലെന്നുത്തരം. പക്ഷെ വിശ്വരൂപം അങ്ങനെ ധരിക്കുന്നില്ല.

            നമ്മുടെ ചെറുപ്പകാലത്ത് എതിര്‍പദങ്ങള്‍ എഴുതുന്നതിനു ചോദ്യം ഉണ്ടായിരുന്നു. ആണും പെണ്ണും എതിര്‍ലിംഗമാണെന്നു മലയാളം മാഷാണ് പഠിപ്പിച്ചത്. അച്ഛനുമമ്മയും എതിരല്ല എന്നനുഭവം മാഷുടെ പ്രയോഗത്തില്‍ കല്ലുകടിയായി നിലനിന്നു. അനുപൂരകലിംഗപദങ്ങളെ എതിരാക്കിയ നാം പാകിസ്ഥാന്‍ ഇന്ത്യയുടെ എതിരാളിയാണെന്നു കരുതുന്നു. ക്രിക്കറ്റ് കളിയില്‍ നല്ലതായി കളിക്കുന്നവരെ പ്രോത്സാഹിപ്പിക്കുന്ന കായികസംസ്കാരത്തിന്റെ വലിയമനസ്സ് നഷ്ടപ്പെടുത്തി സ്വന്തക്കാര്‍ക്കു വേണ്ടി നിലപാടെടുക്കുയും ചെയ്യുന്നതിനു വസുധൈവ കുടുംബകം പറയുന്നവര്‍ക്ക് ലോകമേ തറവാടെന്നു ഉപദേശിക്കുന്നവര്‍ക്ക് മടിയില്ല. അയല്‍പക്കം എന്നതിനോടുളള കൂറു പ്രഖ്യാപിക്കുന്ന വാക്കാണ് അയല്‍രാജ്യം. അതിനെ ശത്രുരാജ്യമാക്കി .അതേ പോലെ ഹിന്ദുവിന്റെ എതിര്‍ വാക്കാണ് മുസ്ലീം എന്നു കരുതുന്നവരും നാട്ടിലുണ്ട്. പര്യായപദങ്ങളുടെ കാര്യവും ഇങ്ങനെ നിര്‍മിച്ചെടുക്കുകയാണ്. ഭീകരവാദി എന്നാല്‍ ഇസ്ലാം വിശ്വാസി, സിക്കുകാര്‍, എന്നിങ്ങനെ കാലദേശങ്ങള്‍ക്കനുസരിച്ച് വ്യാഖ്യാനങ്ങള്‍ നല്‍കി മുറിവുണ്ടാക്കാന്‍ സാംസ്കാരിക നിര്‍മിത നടത്തുന്നവരുടെ പക്ഷത്താണോ നാം നില്‍ക്കേണ്ടത്?..ഇത്തരം വിശ്വാസങ്ങളെ തകര്‍ക്കുന്നതാകണം ഈ രംഗത്തു ഇടപെടുന്ന സിനിമകള്‍. അല്ലെങ്കില്‍ അതു ജനാധിപത്യവിരുദ്ധശക്തികള്‍ മുതലാക്കും. നിര്‍മാതാവിനു മുടക്കുമുതലു കിട്ടുമെങ്കിലും സമൂഹത്തിനു നഷ്ടം തന്നെയാകും ഫലം. ആ നഷ്ടം ഇരു ചേരികളായി മുറിയുന്നവരെ കൂടുതല്‍ സ്പര്‍ദ്ധയുളളവരാക്കി മാറ്റുന്നതിലൂടെ സംഭവിക്കുന്നതാണ്. മതപരമായ ശത്രുത ഉളളില്‍ കൊണ്ടു നടക്കുന്നവരാണ് യഥാര്‍ഥത്തില്‍ മതനിന്ദ നടത്തുന്നത് എന്നു പറയാനാനുളള ആര്‍ജവം വിശ്വരൂപം കാട്ടിയില്ല. എന്തു കൊണ്ട് ഇസ്രയേല്‍ ഭികരത നമ്മള്‍ക്കു പരാമര്‍ശവിധേയമാകുന്നില്ല എന്ന ചോദ്യം കൂടി ചോദിക്കട്ടെ 

അന്നയും റസൂലും അഥവാ പ്രണയത്തിന്റെ മതം.

                    ഒരു പയ്യന്‍ യദൃശ്ചികമായി ഒരു പെണ്ണിനെ കാണുന്നു. വല്ലാത്ത ആകര്‍ഷണം. അവളുടെ പിന്നാലേ കൂടുന്നു. പതുക്കെ അവളുടെ മനസ്സില്‍ കയറുന്നു.പ്രതിസന്ധികള്‍. അവരിരുവരും ഒളിച്ചോടുന്നു. ജീവിതം തുടങ്ങുമ്പോള്‍ ചെയ്യാത്ത കുറ്റത്തിന് അവന്‍ പോലീസിന്റെ പിടിയിലാകുന്നു. അവളെ വീട്ടുകാര്‍ മറ്റൊരുത്തനു വിവാഹം കഴിച്ചു കൊടുക്കാന്‍ തീരുമാനിക്കുന്നു. ആ ദിവസം അവന്‍ പോലീസിനെ കബളിപ്പിച്ച് അവളെ വീണ്ടെടുക്കാനായി ശ്രമിക്കുന്നു. ഒരുവിധം അവളുടെ വീട്ടില്‍ എത്തിയപ്പോള്‍ അവള്‍ കൈവിട്ടു പോയിരുന്നു. മരണത്തിലേക്ക്.

ഇതാണ് അന്നയും റസൂലും. ഇതു മാത്രമല്ല സിനിമ.

                       രണ്ടു മതക്കാര്‍. വിവാഹവും മതവും. മതം മാറണോ? റസൂല്‍ ആദ്യം മുതല്‍ ഉറപ്പിച്ചു പറയുന്നു. ഞാന്‍ മതം മാറില്ല. അന്നയും മാറേണ്ട. അന്നക്കെന്നെ ഇഷ്ടമാണ്. എനിക്കു അന്നയേയും.മതാതീത പ്രണയത്തിന്റെ മുഖമാണ് ഈ സിനിമയ്ക്കു കാലിക പ്രസക്തി നല്‍കുന്നത്. അത്തരമൊരു വിശുദ്ധപ്രണയം രൂപപ്പെട്ടു വരുന്നതിന്റെ പതിഞ്ഞ രീതി പലര്‍ക്കും സുഖിച്ചെന്നു വരില്ല. കാരണം പ്രണയം കോലാഹലങ്ങളില്ലാത്ത ദാഹവും മോഹവും ആണ്. ചിലപ്പോള്‍ അതിരു വിടും .സ്ഥലകാലങ്ങള്‍ മറക്കും. കാത്തിരിക്കുക എന്നത് പ്രണയത്തിന്റെ നാള്‍വഴിയില്‍ പൂത്തു നില്‍ക്കുന്ന സുഗന്ധം തന്നെ.മൊബൈല്‍ ഫോണ്‍ കാലത്തെ പ്രണയത്തിനു കൊച്ചു കൊച്ചു സന്ദേശത്തുടക്കം. ശുഭരാത്രിയും മധുരസ്വപ്നങ്ങളും ആശംസിക്കുമ്പോള്‍ അറിയാം അതൊന്നുമല്ല ആ കുറുകിയ സന്ദേശങ്ങളുടെ ഹൃദയത്തിലുളളതെന്ന്. ആ വൈകാരികാവസ്ഥ മനോഹരമായി ആവിഷ്കരിക്കാന്‍ ചിത്രത്തിനു കഴിഞ്ഞു. പ്രണയത്തിന്റെ മതമേതെന്ന് വളരെ വശ്യമായി ഈ സിനിമ പറയുന്നു.

                അന്ന ഒരു സെയില്‍സ് ഗേളാണ്.അന്ന സാമ്പത്തികമായി ബുദ്ധിമുട്ടുളളവള്‍.വളരെ നിറം മങ്ങിയ കുടുംബബന്ധങ്ങള്‍. അവള്‍ക്കാശ്വസിക്കാനായി എന്തെങ്കിലും ഉണ്ടോ? ഇല്ലെന്നു പറയാം. സദാ വിഷാദം തളം കെട്ടി നില്‍ക്കുന്നു .നടത്തവും നോട്ടവും ശബ്ദവും എല്ലാം സൗമ്യമായ നിഴല്‍ വീണു മെലിഞ്ഞവള്‍.. നമ്മുടെ നാട്ടിലെ പെണ്‍കുട്ടികളെ നിര്‍വിചിക്കുമ്പോള്‍ മറന്നു പോകുന്ന വിഭാഗം. പ്രശ്നസങ്കീര്‍ണമായ ഇത്തരം കുട്ടികള്‍ എങ്ങനെ ജീവിക്കുന്നു. അവര്‍ക്കെന്താണ് പ്രതീക്ഷിക്കാനുളളത്? വരുന്നതു പോലെ അനുഭവിക്കുക എന്നതിനപ്പുറം? നിര്‍വികാരമായ ഭാരം എന്നു വിശേഷിപ്പിക്കാവുന്ന ജീവിതം സ്വന്തം ശബ്ദത്തിനു വിലയുണ്ടെന്നു തിരിച്ചറിയുന്നില്ല. അവള്‍ മെഴുകുതിരിപോലെ എരിഞ്ഞു തീരും. ഉരുകുന്ന മെഴുതിരികള്‍ക്ക് പരിഭവമോ പ്രതിഷേധമോ ഇല്ലല്ലോ?അച്ഛന്റെ നിര്‍വികാരതയ്ക്കും ആങ്ങളയുടെ പകയ്ക്കും അമ്മയുടെ നിസ്സഹായതയ്ക്കും ഇടയില്‍ മകള്‍ എന്താണ് ?സങ്കടജീവിതങ്ങളുടെ മുഖമുളള ഒരു നടി അന്നയെ മികവുറ്റതാക്കി. തുടക്കം മുതല്‍ ഒടുക്കം വരെ അവള്‍ പാലിക്കുന്ന ഒതുക്കം(ഞെരുക്കം) അതാണ് കേരളത്തിലെ പെണ്‍ജീവിതത്തിന്റെ ദരിദ്രമായ വര്‍ത്തമാനം. പളളി വികാരിക്ക് പെണ്‍മനസ്സുകള്‍ വായിക്കാനാവാതെ മനസ്സമ്മതം യാന്ത്രികമായി പറയിക്കുന്ന ദൗത്യമാണോ ഉളളത്? ഇവിടെ മതത്തിന്റെ മതം സ്വയം പരിഹാസ്യമാകുന്നുണ്ട്. അതെ അന്ന മതത്തോട് മരണം കൊണ്ടു പോരാടി എന്നു പറയാം. എങ്കിലും അതു തിരിച്ചറിയാന്‍ മതത്തിനു കഴിഞ്ഞോ ?

                      മട്ടാഞ്ചേരിയുടെ മനസ്സ് പളളിക്കും കൊളളയ്ക്കും കാവല്‍ നില്‍ക്കുന്നു. നീതിരഹിതമായ ഇടപാടുകള്‍ക്ക് പങ്കാളിയാകുന്നതില്‍ ആര്‍ക്കും മനസ്സാക്ഷിക്കുത്തില്ല. ഒരു പെണ്ണിനെ മനസ്സിലാക്കാന്‍ കഴിയാത്ത ഇടം മാത്രമല്ലത്. ഭരണകൂടവും മതവും പ്രതിപക്ഷത്തു നിന്നു സംസാരിക്കുന്നു. യൂണിഫോമിട്ടവര്‍ മനുഷ്യനെ അറിയാതെ പോകുന്നു. ഒരു പ്രതിഷേധയോഗത്തില്‍ കൗതുകം കൊണ്ട് എത്തി നോക്കിയാല്‍ അതാരുടെയെങ്കിലും ക്യാമറയില്‍ പതിഞ്ഞാല്‍ ഭീകരബന്ധം എന്ന ലേബല്‍, അല്ലെങ്കില്‍ സുഹൃത്തിന് നാമറിയാത്ത അധോലാകബന്ധമുളളതിനാല്‍ നാമോരോരുത്തരും പ്രതിപ്പട്ടികയിലാകേണ്ടിവരും ഇന്നോ നാളെയോ എന്ന അവസ്ഥ. മാറുന്ന കേരളം .സൂക്ഷിക്കുക യൗവ്വനമേ, നിന്റെ പിറകേ നീയറിയതെ ഒരു കൈവിലങ്ങ് എപ്പോഴുമുണ്ട്. ഈ അവസ്ഥ ചിത്രീകരിക്കാനായി സിനിമ സ്വീകരിച്ച സമീപനം വേണ്ടത്ര മനസ്സിലാക്കപ്പെട്ടിട്ടില്ല എന്നു വേണം കരുതാന്‍.

അഭിനയത്തന് അഭിനയം എന്നു പേരു പറഞ്ഞു കൂടാ എന്നു ഈ സിനിമ വ്യക്തമാക്കിത്തരുന്നു.ആന്‍ഡ്രിയയുടെ അന്നയും ഫഹദ് ഫാസില്നറെ റസൂലും എത്ര സ്വാഭാവികവും നിഷ്കളങ്കവുമായി കഥാപാത്രജീവതത്തിലൂടെ കടന്നു പോകുന്നു. കഥാപാത്രങ്ങളുടെആത്മാവിലൂടെയുളള പ്രയാണമാണ് അഭിനയം എന്നു വിശേഷിപ്പിക്കാമെങ്കില്‍ അതിന്റെ ആസ്വാദ്യത ഈ സിനിമയിലുണ്ട്. ഗാനങ്ങള്‍ അനാവശ്യമായ അലങ്കാരമാണെന്ന സത്യം ഓര്‍മിപ്പിക്കുകയും ചെയ്യും. സാധാരണക്കാരുടെ ജീവിതം അതു കാണാനൊരുമ്പെട്ടു എന്നതും വലിയ കാര്യം തന്നെ,

പ്രമുഖ ഛായാഗ്രാഹകൻ രാജീവ് രവിയുടേ ആദ്യ ചിത്രമാണ് - ‘അന്നയും റസൂലും. പ്രതീക്ഷ എന്ന വാക്ക് ഉപയോഗിക്കട്ടെ.

അറബ് വസന്തത്തിലെ വിമോചന ചത്വരം

1928 -നൈല്‍  നദീതീരത്തുള്ള വളരെ ദരിദ്രമായ കുടുംബത്തില്‍ ജനിച്ച ഹൂസ്നി മുബാറക് മത നിരപെക്ഷതയുടെയും ജനാധിപത്യത്തിന്റെയും പ്രവാചകനായി ആമേരിക്ക അടക്കമുള്ള പശ്ചാത്യ ശക്തികള്‍ക്കു പ്രിയംകരനായി രാജ്യം ഭരിച്ചത്  മൂന്ന് ദശകങ്ങള്‍ .മൂന്ന് പതിറ്റാണ്ട് കൊണ്ട് മുബാറക് ഉണ്ടാക്കിയ സ്വത്ത് ഏകദേശം 4000- 7000  -കോടി ഡോളര്‍ വരും. ഭരണാധികാരികള്‍ മഹാ കോടീശ്വരന്മാര്‍ ആകുന്നതു എങ്ങനെ ? ലോകത്തെവിടെയും ചോദിക്കേണ്ട ചോദ്യം ആണിത്.?
 ടുനീഷ്യില്‍ തുടങ്ങിയ ജനാധിപത്യ വിപ്ലവം ഈജിപ്തില്‍ എങ്ങനെ പ്രവര്‍ത്തിച്ചു എന്നത് നമ്മുടെ മുമ്പാകെ ചര്‍ച്ച ചെയ്യുകയാണ് തഹ്രിര്‍ ദി ഗുഡ്, ദി  ബാഡ്, ആന്‍ഡ് ദി  പോളിടീഷ്യന്‍ എന്ന ഡോക്കുമെന്ററി  സിനിമ.
90  മിനിട്ട്  ദൈര്‍ഘ്യമുള്ള ഈ സിനിമ മൂന്നു യുവ സംവിധായകരുടെ കൂട്ടുല്‍പ്പന്നം ആണ് .
എന്താണ് ഈ ഫിലിമിന്റെ പ്രസക്തി. മൂന്നു കാഴ്ചപ്പാടില്‍ അവതരിപ്പിക്കുന്നു എന്നത് മാത്രമാണോ?
ചരിത്രത്തെ അടയാളപ്പെടുത്തുന്നു എന്നതാണോ?
ക്യാമറയുടെ സഹജമായ ദൃശ്യബോധത്തിനപ്പുറം പ്രകടിപ്പിക്കുന്ന ഉള്‍ക്കാഴ്ചയുടെ ഒരു സാന്നിധ്യം.
എല്ലാ രാജ്യക്കാര്‍ക്കും ഓര്‍ത്തു വെക്കേണ്ട ചില പാഠങ്ങള്‍ .
 ജനതയിലേക്ക്‌ ഇറങ്ങി  പങ്കാളിക്കാഴ്ച്ചയുടെ   അനുഭവതലം  സൃഷ്ടിക്കുന്നതിലെ  മികവു. 
വിഭിന്ന  സമര രൂപങ്ങള്‍ 

• ഫെസ് ബുക്ക്, ട്വിട്ടര്‍ തുടങ്ങിയ സോഷ്യല്‍ മാധ്യമങ്ങളെ ഫലപ്രദമായി ഉപയോഗിച്ച പുതുതലമുറയുടെ  നെറ്റ് വര്‍കിംഗ് ലോകത്തിനു പുതിയ സാധ്യതയും ഭരണാധികാരികള്‍ക്ക് പുതിയ ഭീഷണിയും ഉയര്‍ത്തുന്നുണ്ട്. നിയമം സോഷ്യല്‍ മീഡിയ അപകടകാരിയെന്ന് വിധിക്കും. ആര്‍ക്കും എന്നും ഇപ്പോഴും സജീവമാക്കി ചര്‍ച്ചകളെ നിലനിറുത്താന്‍ കഴിയും ചര്‍ച്ചകളും സംവാദങ്ങളും ചിന്തയെ രാകി മൂര്‍ച്ച കൂട്ടും.ആശയങ്ങളുടെ സൂക്ഷ്മ പരിശോധന ,വിശകലനം, വിമര്‍ശനം ,ഐക്യപ്പെടല്‍, വിയോജിപ്പ്, തിരുത്തല്‍, സമാന മനസ്സുകളുടെ ഗ്രൂപ്പുകള്‍ ആകല്‍. ഒക്കെ സോഷ്യല്‍ നെറ്റ് വര്‍ക്കിലൂടെ നടക്കും. കേവലം ഉല്ലാസമല്ല. അവയെ ചെല്ലക്കിളികള്‍ തമ്മിലുള്ള പുന്നാരം പറച്ചിലായ് കാണരുത്. സമൂഹത്തില്‍ നിന്നും കിട്ടിയ അനുഭവങ്ങള്‍ പങ്കുവെക്കല്‍ അനുഭവങ്ങളെ സമാഹരിച്ചു ചില നിഗമനങ്ങളില്‍ എത്തി ചേരുന്നതിനും സഹായിക്കും.പൊതു സമൂഹത്തിനു  പരസ്പരം മനസ്സ് കൂട്ടിക്കെട്ടാനും അങ്ങനെ കരുത്തു നേടാനും കഴിയും.
•  

• സമരം ശക്തിപ്പെടുത്താന്‍ ഫോട്ടോഗ്രാഫര്‍മാര്‍ക്ക് എന്ത് ചെയ്യാന്‍ കഴിയും? അവര്‍ നേര്‍ക്കാഴ്ച്ചകളുടെ തീവ്രത പകര്‍ത്തി തെരുവുകളില്‍ പതിച്ചു. നെറ്റില്‍ ഇട്ടു .

• മൊബൈല്‍ ഫോണ്‍ സ്മരായുധമായി .മെസേജ് മാത്രമല്ല, ഫോട്ടോകള്‍ ലഘു വീഡിയോകള്‍ എല്ലാം പകര്‍ത്തി നെറ്റില്‍ അപ്ലോഡ്   ചെയ്തപ്പോള്‍ അസംഖ്യം കണ്ണുകളും കാതുകളും ജാഗ്രതയോടെ സ്വന്തം കര്തവ്യ ബോധം നേരെയാക്കി.

• സംഗീതമായിരുന്നു മറ്റൊരു ഇനം. കൂട്ടപ്പാട്ടുകള്‍ മുദ്രാഗീതങ്ങള്‍ ഇവ ആവേശം നല്‍കും.പക്ഷെ സമര വീര്യം അല്പം അടങ്ങുന്നു എന്ന് തോന്നുമ്പോള്‍ പുതിയ പാട്ടുകള്‍ ഉയരുകയായി.തല്‍സമയ സൃഷ്ടികള്‍ . അതിന്റെ ഊര്‍ജം പ്രതിരോധത്തിന്റെ സൂക്ഷ്മ കണങ്ങള്‍ പ്രസരിപ്പിക്കുന്നതും നാം കാണുന്നു ഈ സിനിമയില്‍ .

• ചാര്‍ട്ടുകള്‍ സമരത്തില്‍ ഉപയോഗിക്കുന്നത് എങ്ങനെ എന്ന് ഇതുവരെ എനിക്കറിയില്ലായിരുന്നു. ഒരാള്‍ ഒരു ചാറ്റും മാര്കര്‍ പേനയും നിറത്തില്‍ ഇടുന്നു. നിങ്ങളുടെ നിലപാട് പ്രതിഷേധം ചുരുക്കി ഒന്നോ രണ്ടോ വാക്യങ്ങളില്‍ എഴുതുക .അത്രയേ വേണ്ടുള്ളൂ.. അത് ക്ലിക്ക് ചെയ്തു ഉള്ളിലെ തീ വാക്കായി. ചാര്ടുകളില്‍ കൊത്തിപ്പിടിക്കുന്ന വാക്യങ്ങള്‍. ചാര്ടുകളുടെ എണ്ണം കൂടി വന്നു .അവയുടെ പ്രിന്റെടുത്ത് വലിയ ബാനര്‍ ആക്കിയപ്പോള്‍ ജനതയുടെ ശബ്ദം. നേതാക്കളുടെ പ്രസംഗങ്ങലെക്കാള്‍ ശക്തം.അത് വായിച്ചു ഉണരാനും എഴുതി ഉണര്‍ത്താനും വീണ്ടും   ആളുകള്‍.
• താമസവും  വെപ്പും കുടിയും  സമരക്കാര്‍ക്കുള്ള പിന്തുണ ആണെന്ന് കരുതുന്നവര്‍ക്ക് തെറ്റി . അതും സമരമാണ്. സമരഭൂവില്‍ ഒരു കുടുംബമായി മാറുന്നപ്രക്രിയ. ചെറിയ സമൂഹത്തിന്റെ ആവശ്യങ്ങള്‍ നിറവേറ്റാന്‍ ആളുകള്‍ മുന്നോട്ടു വന്നു . ബാര്‍ബര്‍മാര്‍ ഫ്രീ ആയി ക്ഷൌരം ചെയ്തു കൊടുത്തു. ഡോക്ടര്‍മാര്‍ സദാ  സമയവും   സന്നദ്ധതയോടെ  ഓടി  നടന്നു  സഹായിച്ചു . ഐക്യപ്പെടലിന്റെ  ചേരുവ  .
•  പോലീസ് ആരുടെതാനെന്ന  ചോദ്യം  വളരെ  ശക്തമായി  ഉന്നയിച്ച  സമരം ആണിത്. സാമാന്യ സങ്കല്‍പം അനുസരിച്ച് ഭരണകൂടം മാറുമ്പോള്‍ പോലീസും മാറും. മര്ദനോപാധി    ആയി എക്കാലവും സേവിക്കുക മാത്രമാണ്   അവരുടെ കര്‍ത്തവ്യം. .ഇതില്‍ നിന്നും വ്യത്യസ്തമായി ജനങ്ങള്‍ക്കെതിരെ തിരിയില്ലെന്നു പോലീസ് നിലപാട് എടുക്കുന്നു. (പോലീസ് ജനപക്ഷത്ത് നില്‍ക്കണം എന്ന സന്ദേശത്തെ വ്യാപിപ്പിക്കുവാന്‍ കഴിയുമോ?)  ക്രമേണ പോലീസ് ഇവിടെ  സമരക്കാര്‍ക്കൊപ്പം ചേരുന്നു.
• പതിനെട്ടു ദിവസം നീട്നു നിന്ന വിപ്ലവത്തിന്റെ പാഠങ്ങള്‍ സിനിമയുടെ ഒന്നാം ഭാഗം ചര്‍ച്ച ചെയ്യുന്നു. ജനങ്ങളുമായുള്ള ഇനര്‍വ്യൂ , പ്രതിഷേധത്തിന്റെ വിഭിന്ന സന്ദര്‍ഭങ്ങള്‍, റിപ്പോര്‍ട്ടിംഗ് .., ക്യാമറയുടെ വേഗതയും ഉത്സാഹവും നല്‍കുന്ന സജീവത ..
• രണ്ടാം ഭാഗം സായുധ സെനയില്കെ ഒഫീസ്ര്മാരുമായുള്ള അഭിമുഖങ്ങള്‍ ആണ്. ഡ്യൂട്ടിയില്‍ ആയിരിക്കുമ്പോള്‍ ഇത്തരം കാര്യങ്ങള്‍ പറയാന്‍  അനുവാദമില്ല എന്ന് പറയുന്ന ഉദ്യോഗസ്ഥന്‍ മുതല്‍ മുഖം വ്യക്തമാക്കാതിരിക്കുമെങ്കില്‍   പറയാന്‍ സന്നദ്ധനാകുന്ന പോലീസ് മേധാവി വരെ. ഉള്ളറ രഹസ്യങ്ങളിലൂടെ ഒരു യാത്ര

സ്വേച്ഛാധിപതികള്‍ ഉണ്ടാകുന്നത് എങ്ങനെ ? 
ആക്ഷേപ ഹാസ്യം കൊണ്ടാണ് മൂന്നാം ഭാഗം തീര്‍ത്തിരിക്കുന്നത്.

• ഒബാമ, മുബാറക് എന്നിവര്‍ ഒന്നിച്ചു നടക്കുന്ന ചിത്രം. ഒബാമയുടെ പിന്നിലാണ് മുബാറക്. ഈ ഫോട്ടോ ഈജിപ്തില്‍ അച്ചടിക്കപ്പെട്ടപ്പോള്‍ ഒബാമ പിന്നിലും മുബാറക് മുന്നിലും ആയി. ഒരു ഏകാധിപതി ഫോട്ടോഷോപ്പിന്റെ പിന്തുണയോടെ ജനമനസ്സില്‍ ഇമേജ് രൂപപ്പെടുത്തുന്ന രീതി ഉദാഹരണ സഹിതം അവതരിപ്പിക്കുന്നു. എണ്‍പത്തി നാല് വയസ്സുള്ള മുബാറക് അദ്ദേഹത്തിന്റെ മുഖത്തെ ചുളിവുകള്‍ ,കണ്‍തടത്ത്തിലെ കറുത്ത പാടുകള്‍ ഒക്കെ ഫോട്ടോ ഷോപ്പ് സാങ്കേതിക വിദ്യ ഉപയോഗിച്ച് മിനുക്കി നിത്യ  നായകന്‍ ആകുന്നു.   ഈജിപ്തില്‍ മുടി കറുപ്പിക്കല്‍ ആദ്യം നടത്തിയത് മുബാറക് ആണത്രേ !
• നേതാവിന്റെ ചിത്രങ്ങള്‍ നാടാകെ പ്രദര്‍ശിപ്പിക്കുന്നതാണ്   മറ്റൊരു നടപടി. എവിടെയും ഞാന്‍ മാത്രം.കൂറ്റന്‍ ഫ്ലക്സ് ചിത്രങ്ങള്‍ ,പ്രതിമകള്‍. ശരിയാണ് ഇന്ത്യയിലെ ചില മുഖ്യമന്ത്രിമാര്‍, ജാനാധിപത്യം കശാപ്പു ചെയ്ത നേതാക്കള്‍ ഒക്കെ ഈ വഴിയാണ് സ്വീകരിച്ചത് സ്വീകരിക്കുന്നതും.ഒരു നേതാവിന്റെ പടം ജനതയ്ക്ക് മേല്‍ ഉയര്‍ന്നു നില്‍ക്കുന്നത് നേതാവിന്റെ കാലത്ത് തന്നെ ആണെങ്കില്‍ സംശയിക്കണം.
• അദൃശ്യരായ   ശത്രുക്കളെ സൃഷ്ടിക്കുകയാണ് മറ്റൊരു തന്ത്രം. "രാജ്യം അപകടത്തില്‍ " .അയാള്‍ രാജ്യങ്ങള്‍ അല്ലെങ്കില്‍ " ആഭ്യന്തര ശത്രുക്കള്‍ " .ഈ വിഷയം സജീവമാക്കുന്നു. ജനത ഒറ്റക്കെട്ടായി പിന്നില്‍ അണി നിരയ്ക്കും. കാപട്യം തിരിച്ചറിയുകയുമില്ല. സംവിധായകന്റെ  ഈ നിരീക്ഷണം  ലോകത്ത്  ഏതു   രാജ്യത്തിലും  ഇന്ന്  കാണാന്‍  കഴിയും.
• ഞാന്‍ നാടിനു  വേണ്ടി  എന്ന് ഇപ്പോഴും  പറഞ്ഞു  കൊണ്ടിരിക്കുക  സ്വയം  സമര്‍പ്പിച്ച  ജീവിത മാണ്.. ക്രമേണ ഞാന്‍ തന്നെ നാട്  എന്ന സമവാക്യത്തില്‍. 
• പേരിടല്‍ ക്രമം .സ്വന്തം പേരില്‍  പൊതു  സ്ഥലങ്ങള്‍ , സ്ഥാപനങ്ങള്‍  ,വികസന പദ്ധതികള്‍ ..വികസനത്തിന്റെ ചിഹ്നങ്ങളില്‍ ഭരണാധികാരി വ്യക്തിപരമായി ആധിപത്യം സ്ഥാപിക്കുകയാണ്.
• പുകഴ്ത്തല്‍ -സംഗീതം ചിത്രകള്‍ മീഡിയ ഇവ സമര്‍ത്ഥമായി ഉപയോഗിച്ചുള്ള ആശയ നിര്‍മിതി. അധികാരി വര്‍ഗത്തിന്റെ പുതിയ ആയുധമാണ് മനസ്സിനെ നിരായുധീകരിക്കുക എന്നത് .
• നിയമങ്ങള്‍ പരിഷ്കരിക്കുക കലോചിതമാക്കുക എന്ന വ്യാജേന തനിക്കു തടസം നില്‍കുന്ന നിയമങ്ങളില്‍ വെള്ളം ചേര്‍ത്ത് അനുകൂലമാക്കുക. ഇങ്ങനെ പോകുന്നു ഭരണകൂട തന്ത്രങ്ങള്‍ .

ഇവയുടെ എല്ലാം ഉദാഹരണങ്ങള്‍ കാണിക്കുന്നുണ്ട് .അവ കാണുമ്പോള്‍ നമ്മുടെ ചില അനുഭവങ്ങള്‍ക്കുള്ള സമാനത ഓടി എത്തും. ലോകത്തിലെ ഏകാധിപത്യ ഭരണ കൂടങ്ങള്‍ ഈ സിനിമ പൊറുക്കില്ല. അത് കൊട് തന്നെ അറബ് വസന്തന്നപ്പുറം സിനിമ ഇടപെടുന്നു. 
ഒടുവില്‍ ഒരു ചോദ്യം ബാക്കി
അസംഘടിതര്‍ സംഘടിച്ചു
ജനതയുടെ കൂട്ടായ്മയില്‍ ഭരണകൂടം നിലം പൊത്തി  
ഇനി ആര് ? വാര്‍ത്തകള്‍ മത മൌലിക വാദികളുടെ കൈകളിലേക്ക് ആണ് ഈ രാജ്യങ്ങള്‍ എന്ന ദുസ്സൂചന നല്‍കുന്നു
വസന്തംജനതയെ മോചിപ്പിച്ചു
ഈ സ്വയം തിരിച്ചറിവ് തുടര്‍ന്നുള്ള ചെറുത്തു നില്പുകള്‍ക്ക് കരുതാകുമോ?ഈ വക കാര്യങ്ങള്‍ സിനിമ ചര്‍ച്ച ചെയ്യുന്നില്ല. എങ്കിലും...വിമോന ചത്വരം അവിടെ ഉണ്ടല്ലോ
സംസ്കാരത്തിന്റെ കളിത്തൊട്ടില്‍ നല്‍കുന്ന പാഠങ്ങള്‍ അവര്‍ തന്നെ രചിച്ചവ .അവര്‍ മനസ്സിരുത്തി പഠിക്കേന്ടവ.
ഈ സിനിമ രാഷ്ട്രീയ സാമൂഹിക പ്രശ്നങ്ങള്‍ എങ്ങന്രെ  ഡോക്ക്യുമെന്റു  ചെയ്യണം എന്നുള്ളതിന് നല്ല തെളിവ് .

Tahrir 2011: The Good, the Bad, and the Politician

-Tamer Ezzat, Ayten Amin, Amr Salama

---------------------------------------------------------------------------------

ചലച്ചിത്രമേളയില്‍  ഒരു ക്ലിക്ക്